भारतीय संरक्षण यंत्रणेमध्ये लवकरच एक मोठा बदल घडणार आहे. देशातच विकसित करण्यात आलेल्या रोबोटिक सैनिकांची एक विशेष तुकडी लष्करी सेवेत दाखल होणार आहे. या स्वदेशी “रोबो सेनेचा” उपयोग युद्ध परिस्थितीत, स्फोटक शोधण्यासाठी, शत्रूच्या हालचालींचा मागोवा घेण्यासाठी तसेच जोखमीच्या ठिकाणी मानवी सैनिकाऐवजी तैनात करण्यासाठी होणार आहे.
संरक्षण संशोधन आणि विकास संघटना (DRDO) तसेच खासगी क्षेत्रातील तंत्रज्ञान कंपन्यांच्या सहकार्याने ही यंत्रणा विकसित करण्यात आली आहे. या रोबो युनिटमध्ये दोन प्रकारचे यंत्रसैनिक आहेत – एक जमिनीवर चालणारे आणि दुसरे ट्रॅक व्हेईकल्स स्वरूपात. काही रोबोंमध्ये गन सिस्टम, नाईट व्हिजन कॅमेरे आणि सेन्सर सुद्धा बसवण्यात आले आहेत.
या प्रकल्पाचा मुख्य उद्देश भारतीय लष्कराच्या क्षमतेत वाढ करणे आणि युद्धक्षेत्रात मानवहानी टाळणे हा आहे. यामुळे सीमेवरील तणावग्रस्त भागांमध्ये पहिली ओळ अधिक सक्षमपणे तैनात केली जाऊ शकते.
या तंत्रज्ञानामुळे भारताच्या संरक्षण क्षेत्रात नवीन पर्व सुरू होणार असून, भारत हा स्वदेशी रोबोटिक डिफेन्स सिस्टम विकसित करणारा मोजक्या देशांपैकी एक ठरणार आहे. या पुढाकारामुळे आत्मनिर्भर भारताच्या दिशेने एक मोठे पाऊल उचलण्यात आले आहे.
