पुणे (प्रतिनिधी):
वसंतदादा साखर संस्था, पुणे येथे कृत्रिम बुद्धिमत्ता (AI) आधारित साखर प्रक्रिया प्रणालीच्या वापरावर चर्चा करण्यासाठी एक उच्चस्तरीय बैठक रविवारी पार पडली. या बैठकीचे वैशिष्ट्य म्हणजे माजी केंद्रीय मंत्री शरद पवार आणि उपमुख्यमंत्री अजित पवार यांची अचानक भेट झाली.
ही गुप्त बैठक राजकीय वर्तुळात चर्चेचा विषय ठरली आहे. सूत्रांनुसार, बंद दरवाजामागे झालेल्या चर्चेमध्ये फक्त तांत्रिक बाबीच नव्हे, तर काही राजकीय घडामोडींसंबंधीही विचारमंथन झाले असावे असा अंदाज वर्तवला जात आहे.
बैठकीसाठी शरद पवार, अजित पवार, जयंत पाटील, दिलीप वळसे पाटील, राजेश टोपे, बाळासाहेब पाटील, हर्षवर्धन पाटील हे प्रमुख नेते उपस्थित होते.
या वेळी AI आधारित यंत्रणा वापरून ऊस उत्पादन आणि प्रक्रिया वाढवण्याच्या दृष्टीने एक नवा आराखडा मांडण्यात आला. संस्थेला निधी मिळवून देण्यासाठी प्रयत्न होणार असून, शेतकऱ्यांना ऊसाचे दर वाढवण्यासाठी पावले उचलण्यात येणार असल्याचे सांगण्यात आले.
या प्रकल्पामुळे 40 टक्क्यांपर्यंत उसाचे उत्पादन वाढण्याची शक्यता वर्तवली जात आहे. तांत्रिक सहकार्याकरिता आंतरराष्ट्रीय कंपन्यांशी करार करण्याचा प्रस्तावही पुढे आला आहे.
